Ahmedi Şiirleri - Şair Ahmedi

Bu ne yüzdür bu nice zülf Yâ-Rab
Meger bu mâhdur ol kalb-i akreb

Aceb bu gül-şen-i cennet mi yâ rûh
Aceb bu çeşme-i kevser mi yâ leb

Bu ne yüzdür ki anı yolda gören yoldan azar
Cân fidî ayagı tozına nedür gûher ü zer

İderem akl-ıla tedbîr ki irem bir dem aña
Ne diyem çünki bu tedbîrümi takdîr bozar

Bu ne zîbâ yüz olur kim hacildür nev-bahâr andan
Gül-ile lâle vü nesrîn düşüpdur şerme-sâr andan

Aceb ne müşgdür zülfüñ ki olur bende aña anber
Ne âhûdur gözüñ ki ider hazer şîri şikâr andan

Bu nîce leb ki âb-ı hayât aña mât olur
Bu nîce kad ki tûbî aña iki kat olur

Gün yañaguñ safâsı-la nev-rûz olur uîd
Gice saçuñ hevâsı-la Kadr ü Berât olur

Bu nice saç ki sabâ boynına salar zencir
Bu nice göz ki ider cânları nişâne-i tir

Yürideli kalemi levha nakş-ı bend-i ezel
Yüzüñ bigi itmedi bir nakş itmeye tasvîr

Bu nicesi dehândür bu nice leb
Ki dir cânlara her dem nahnü akreb

Yüregüm ditrer uş kim şem bigi
İçüme saldı ışkuñ tâb-ıla teb

Bu nice sûret ü ne şekl ü ne şemâyildür
Ki ışkına yir ü gök zerre zerre mayildür

Felekde ay-ıla gün yir yüzinde ins-ile cin
Anuñ cemâlı kemâline cümle kâyildür

Büny✠uralı memleket-i kevne Kird-gâr
Yaratmadı senüñ bigi bir mâh-ruh-nigâr

Nakşını yazıcah yüzüñüñ kıldı âferîn
Bu hûb âferînişe ol Âferîd-gâr

Bu resme kim ider gamzeñ kıyâmet
Aceb kim kurtıla senden selâmet

Kıyâm itdükçe sen cân secde kılur
Zihî zîbâ kıyâm u hûb-kâmet

Bursa sultânlara neşîmendür
Yümn-ile toru Vâdi Eymendür

Huld bâgı bigi bahâr u hazân
Yâsemîn-ile tolu sûsendür