Aşık Çelebi Şiirleri - Şair Aşık Çelebi

Geçüp tenden letâfet kesb idüp ‘ışkunla cân oldum
Anunçün çeşm-i insândan perî gibi nihân oldum

Dehânında güm oldı cân gönül zülfinde yol azdı
Tecerrüd ‘âlemine ben tek ü tenhâ revân oldum

Gelse nigâr ayaguna başdan şarâba çek
Def’-i hicâb eyle su’âl u cevâba çek

Dök karşusında akça yirine sirişküni
İtdükleri cefâları bir bir hesâba çek

Gerçi açmadı kapu dilber rakîbe nâzdan
Bana bir mihr itdi ma’nâda yine açmazdan

Sîne-i pür-dâgı çeng-i ‘ışka yakı eylerüm
Tâ ki hâlî olmayam bir lahza söz ü sâzdan

Gerçi dilber gitdi itdi va’de-i vasl ile lâf
Korkarum ol serv-kâmet vâ’deye ide hilâf
Rabbenâ ahfeznâ min el-mevt bi-hecr ü ihtilâf
Yâ gıyâse’l-müstagîsîn neccinâ mimmâ nahaf

Tâ kıyâmet şöyle bâkî ola fırkat korkarum

Gerçi kim hûblara ‘işve vü nâz oldı şümâr
‘Âşıka sûz u güdâz ile niyâz olur kâr

Ger cefâyise eger gâh vefâ olsa ne var
Sen esirge beni baht oldugı yeter gaddâr

Giceler ‘ışk ehlinün dûd-ı siyâhı gibidür
Keh-keşân üstinde anun medd-i âhı gibidür

Güç gören kaşun kemânından sıgınur zülfüne
Mülk-i Rûm-ı hüsnde zıll-ı İlâhî gibidür

Girdâb-ı muhabbet ki cihân reh-güzeridür
Âvâre habâb anda fenâ ehli serîdür

Agyâra çeküp döke yüzi suyunı tîgün
Taşdan çıkarupdur ol anun alnı derîdür

Gönlümi yıkmış idi irişdi hat-ı gubâr
Meşhûrdur ki yar yıkıldugı gün tozar

Dil zîr-i bâd-ı derdde ham oldı dâl-veş
Gitdükce yâr yine yükin yukarı yıgar

Gönül mâl ü menâli terk idüp fakr u fenâ ister
Geçüp ma’mûre-i âfâkdan vîrân serâ ister

Tılısm-ı ejdehâ timsâlidür hüsni bozar anı
Şu kim feth-i der-i gencîne-i mülk-i bekâ ister

Gönül ma’mûre-i genc-i hayâl-i hüsn-i cânân ol
Degül gam sûretâ derd ü gam-ı ‘ışk ile vîrân ol

Sürinsün der peyünce sâye-veş üftâde ‘âşıklar
Benüm serv-i revânum sûy-ı gülzâre hırâmân ol