Aşık Çelebi Şiirleri - Şair Aşık Çelebi

Başına efser iden şah işiginün minnetin
Çekmeye yirden göge çarh-ı berînün minnetin

Öldügümden sonra tek irgür gubârum kûyına
Ey sabâ yüklet bana rûy-ı zemînün minnetin

Beni sanman ki dilber ‘ışkı böyle mübtelâ eyler
Beni böyle ezel bezmindeki kavl-i belâ eyler

Semâ’ idüp ‘aceb mi raksa girsem şevk-i şâdîden
O meh ‘uşşâka kasd-ı rahm idüp zikr-i vefâ eyler

Ben ne hâkem ni’met-i vuslat ola himmet bana
Ölicek yâdunla cân virmek yeter devlet bana

Leylâ vü Mecnûn gibi nakkâşlar bir safhada
İkimüz nakş eylemek şâhum yeter vuslat bana

Benzedür gerçi güneş yüzüne mâhı lekeler
Olmasun hüsnine magrûr sakınsun lekeler

Öykünürler hat u zülfüne dimezler mi ‘aceb
Yolalar sünbüli reyhânı çemende ekeler

Berf-mânend agarmış kara günlü sakalun
Giceyi güne katup irdi şitâ-yı ecelün

Ey kemân-saht sen ebrûsı gamını çekdün
Yâ hadeng-i müjesi hasreti mi bükdi belün

Besdür sirişk-i çeşm ile dâg-ı şerer-feşân
Da’vâya ma’ni lâzım ise ‘âşıka nişân

Şemşîr-i yâr belde durur bir harâmîdür
Kurtulmaz anda eylemeyen varı der-miyân

Bilünür ‘âşık u agyâr işigünde ne şekk
Ki dimişler sanemâ Ka’beyi merdâna mihek

Gördügi dilber ile ‘âşık oyunın oynar
Çok oldukca yaşı merdüm-i çeşm oldı bebek

Bir agız dimedi ben hasteye tîmâr olsun
Agzınun zerrece yok mihri hemîn var olsun

Her ki Mansûr gibi zülfüne ber-dâr oldı
Şühedâ hayline mahşerde ‘alemdâr olsun

Bir nazar kılsa bana ger o meh-i çâr-dehüm
Mâh-ı nev tarf-ı felekde ola tarf-ı külehüm

Kimseye egmez idüm başı gönül ‘âlemde
Eger olsa kaşı mihrâbı benüm secde-gehüm

Bî-sütûn-ı gamda urdum taşa başı başa taş
Kûh-kenden kalmadum girü bu ben âvâre baş

Âşiyân-ı ‘ışk bozmadı serümden seng-i ta’n
Gerçi dirler ki yırak gider elün atdıgı taş