Aşık Çelebi Şiirleri - Şair Aşık Çelebi

Kime yanam yakılam ben ne kılam vâ-veylâ
Gördigüm dem dil ü cân ile gönül virdüm ana

Kâkül ile kad-ı bâlâsı belâ üzre belâ
Ugradum derde ki olmaz ana ‘âlemde devâ

Kimsenün hîç dehânuna sözi yok
La’lün anılsa sükkerün tuzı yok

Öykünelden berü kad-ı yâre
Nergisün servi görecek gözi yok

Kızıl Elmada görenler mehçe-i sancâgunı
Sandı sîb-i müslimîdür ki nihâl üstindedür

Surh-ser oklı şikârundur serinde nâvekün
Şâhin-i deşt-i gazâdur ki gazâl üstindedür

Kûh-ı endûh-ı ‘ınâdur görinen baş degül
Ebr-i bârân-ı belâdur karadan kaş degül

Ko elünden leb-i câm agzuna düşmez sûfî
Mey-i gülgûn didigün sen yiyecek aş degül

Kuhl-ı insâf it ‘atâ dil çeşmini ac eyleme
Cânı tîr-i mihnet-i nâdâna omac eyleme
Mülk-i ‘ırzı ‘asker-i zılletle târâc eyleme
Yâ İlâhî ‘Âşıkı nâ-merde muhtâc eyleme

Seng-i gam fazl ehlinün dest-i cefâsından bana

Kurtuluş yok olalı dâmâd elinden kızlarun
Bir kulum ki olmadum âzâd elinden kızlarun
Kime idem bilmezem bîdâd elinden kızlarun
Âh elinden kızlarun feryâd elinden kızlarun

Bilmezem ki âgûmı katıldı çölmek aşına

Küşte-i gamze tutupdur kûy-ı cânân yolların
Bir celâlîdür ki çeşmi kesdi sultân yolların

Çîn ü Mâçîni kesâda virdi bûy-ı kâkülün
Sürme-i gerd-i rehün kesdi Sıfâhân yolların

La’lüne hattuna hatt reyhânı yazmışdur temam
Hâl-i Hızr u çeşme-i hayvânı yazmışdur temâm

Bir şebistândur saçun etrâfına sebz ile hatt
Hâşiye idüp Nigâristânı yazmışdur temâm

Lebüne benzemege goncede güftâr gerek
Servde kaddüne öykünmege reftâr gerek

‘Azm-i kûy-ı ‘adem itdüm n’ideyim cân u dili
Sâlik-i râh-ı Nebî yolda sebük-bâr gerek

Mâh-ı nev-hûrşîde kem benden kerem senden diyüp
Bildi çün eksüklügin kadri kemâl üstindedür

‘Âşık olsa n’ola bülbüller görüp Şîrîn gibi
Nakş-ı Hüsrevdür gül asılmış nihâl üstindedür