Meclisde piyâle çarh-ı devvâr
Üstinde habâbı necm-i seyyâr
Dil-dâre gönül perî dimişsin
Benzer gözüne görünecek var
Merhamet kıl ol şeh-i hûbâna sıhhat rûzi kıl
Halk-ı ‘âlem cânıdur ol câna sıhhat rûzi kıl
Öldi gamda ‘Âşık-ı nâlâna sıhhat rûzi kıl
Yâ İlâhî lutf idüp cânâna sıhhat rûzi kıl
Kaşları gibi hilâl olan meh-i tâbânuma
Murâdum mîvesi bitmez ne hâsıl nev-bahârumdan
Vefâdan şemme yok andan ne bitdi lâle-zârumdan
Ne toz kopardı bâd-ı âh kim eşk itmese teskîn
Felekler raks iderdi gird-bâd-âsâ gubârumdan
Müsellem oldı bana tîg-i âhumla diyâr-ı ‘ışk
Ben oldum devletünde pâdişâhum şehriyâr-ı ‘ışk
Bana hâr-ı cerâhat pister-i râhat berâberdür
Birûnum çâk çâk-ı gam derûnum hârhâr-ı ‘ışk
Nat’-ı hüsne beydak-ı hâlün salup ferzâne at
Sâmirî sihrin yehûdî-hâne içre itdi mât
Çîn idüp ebrûların baksa Mogol-çîn gözlerün
Şâhine benzer şikâre süzülüp bükmiş kanat
Ne açar var bana zahm-ı hadeng-i yârdan gayrı
Ne aglar bulunur bu dîde-i bî-dârdan gayrı
Döner yok üstüme nergiz duhân-ı âhdan özge
Yanar yok hâlüme hîç âh-ı âteş-bârdan gayrı
Ne mâlum var ne câhum var ne zevkum ne sürûrum var
Cihânı hîçe satdum şimdi yoklugla huzûrum var
Güneş sensin hilâl eksükli kem benden kerem senden
Temâm it feyz-i mihrünle egerçi bin kusûrum var
Nesîm-i ‘ışk ile deryâ gibi ben çünki cûş itdüm
Niçe leffâf-ı ehl-i kâli cû gibi hamûş itdüm
Lebün vasfında tûmârum idüp ta’vîz-i sâk-ı ‘arş
Dür-i şehvâr-ı şi’rüm kurta-ı gûş-ı sürûş itdüm
Niçe bir esrâr-ı gamla olalum hayrân ogat
İçelüm câm-ı mey-i gülfâm olalum kan ogat
Cur’a-dân-ı ‘ışkını bana vasiyyet eyleyüp
Didi Mecnûn ‘aklı var ise ola her an ogat
Bu şaire henüz hiç kimse yorum yapmadı. İlk yorum yapan sen ol!