Baki Şiirleri - Şair Baki

Gözüm yaşına ol la’l-i leb-i sîr-âb olur bâ’is
Dem-â-dem kana ey sâkî şarâb-ı nâb olur bâ’is

Semâ’a girse n’ola câm-ı meyden zâhid-i hüşyâr
Ki raks-ı zerreye hurşîd-i ‘âlem-tâb olur bâ’is

Gubâr-ı hattuñ olmaz çünki hayrân olmaga bâ’is
Nedür la’l-i lebüñ çak böyle handân olmaga bâ’is

Hevâ-yı zülfi kılmışdur seni ey ebr âvâre
Gözüñ yaşı budur seyl-i fırâvân olmaga bâ’is

Gül gibi halkı nesîm-i hulkı handân eylesün
Nev-bahâr-ı ‘adli âfâkı gülistân eylesün

Âsmânuñ gûşe-i bâm-ı zümürrüdfâmına
Kadri tâvûsı çıkup gün gibi cevlân eylesün

Gülgûn kabâsı ol sanemüñ sanki lâledür
Cism-i latîfi lâle-i hamrâda jâledür

Karşumda allar geyüp ol lâle-ruh yine
Gülgûnîlerle ‘aklum alur san piyâledür

Gül meclisinde lâle yine kıldı âşikâr
Âyîn-i bezm-i ‘işret-i Cemşîd-i kâmkâr

Gül-zâre gel ki cümle cihândan nümûnedür
Sahn-ı çemende hâsıl olur seyr-i her diyâr

Gülşene altun varaklar zeyn idüp bâd-ı hazân
Güyiyâ zer-kûblar dükkânı oldı gülsitân

Rişte-i bârân gümiş tel sîm-keş ebr-i harîf
İki çarha döndiler gûyâ zemîn ü âsmân

Gül-sitân bezm-i şarâb u câm-ı mey güldür baña
Kulkul-i halk-i surâhî savt-ı bülbüldür baña

Ârızuñda ol iki zülf-i girih-gîrün senüñ
Suya konmış iki garrâ tâze sünbüldür baña

Gül yüzüñ vasfında bülbül kılsa elhânı dürüst
Bâgda bir goncanuñ kalmaz girîbânı dürüst

Olsa ‘irfân ehline cânân olınca şöyle kim
Zülf-i müşgîni şikeste ‘ahd ü peymânı dürüst

Gün togdı şâh-ı ‘âlem uyanmaz mı hvâbdan
Kılmaz mı cilve hayme-i gerdûn-cenâbdan

Yollarda kaldı gözlerümüz gelmedi haber
Hâk-i cenâb-ı südde-i devlet-me’âbdan

Gün yüzin ‘arz eyledi nev-rûzda ol meh-likâ
Mihr altun kaplu bir âyîne virdi rû-nümâ

Nev-bahârun nakşına bir savt-ı rengîn bagladı
Başladı sâz u nevâya bülbül-i destân-serâ