Qeybe çekiler Şiiri - Sevinc Arzulu

Yaşa dolar sevdiyin,
Gül tək solar sevdiyin.
Bir gün olar sevdiyin,
Gedər qeybə çəkilər.

Gəzmə avarə, veyil,
Salma əğyarə meyl.
Adın yaxşıya deyil,
Vallah eybə çəkilər.

Tuş olduq yel-nəsminə,
Bahar-qışın kəsminə.
Payızımın rəsminə,
Sarı meyvə çəkilər.

Sırasına qatmasa,
Ürəyimə yatmasa,
Məktuba, əl çatmasa,
Kiçik töhvə çəkilər.

Dua et nur saçançun,
Pisliklərdən qaçançun.
Dünyaya göz açançun,
Bəyaz lövhə çəkilər.