Mirin Dan Ber Min Şiiri - Mehmet Çobanoğlu

Ez karxezala, ser li van çiya me
Li tim ber qame, tifing û kêra me
Dayikê janek ket nav gurçikê min
Ez nêçîr û seydê nêçîrvana me

Li xezeb û xişim, jehr min reşîya
Dadê bejn û bala min hilweşîya
Ez birîndarim birîna min kûr e
Gula, li ser çiqila min weşîya

Dayê rebenê li ser min de were
Kes xem û êş, kes derdê min nizane
Min avêtin li ber kêran ber gûzan
Daîkê birîna min bêdermane

Ka şeveqa min, ku ma bihara min
Ev dil e, ev kurçik e, ev kezeb e
Dadê bi serdanpê li min şewate
Jiyan û dildarî min re xezeb e

Zaliman çima min nedan yarê min?
Rûçikandin por û biskên serê min
Min kefenê xwe da, li ber serê xwe
Dayê min yar xwest, wan mirin dan ber min

Mehmet Çobanoglu
02.05.2020
Stenbol