Deniz Şiiri - Sevinc Arzulu

Sahilə sığınıb hey yatım, qədər.
Əzizsən şeirim, bayatım qədər.
Mən səni sevirəm həyatım qədər,
Sən mənim ən sadiq sevgilim, dəniz.

Ləpələr astaca məni yırğalar,
Qalar uzaqlarda dərdlər, qovğalar.
Boy versin mənə də narın dalğalar,
Azalsın kədərim, nisgilim, dəniz.

Solub, talan olub güllü-gülzarım,
Dənizin qoynuna düşdü güzarım.
Qumluqda qazılsın dərin məzarım,
Sahildə qoyulsun heykəlim dəniz.

Bəzən sürət ilə vurur ürəyim,
Bəzən alovlanıb yanar kürəyim.
Söz ilə yoğrulub halal çörəyim,
Şeirlə qoyulub təməlim dəniz.

Neynirəm dövləti, neynirəm varı,
Asudə dincliyim olaydı barı.
Gözümdən axan yaş təmiz mirvari,
Qoynuna əbədi mən gəlim, dəniz.