Söz qaşı Şiiri - Sevinc Arzulu

Saçımda bəmbəyaz telə dönmüsən,
Qəlbimni üşüdən yelə dönmüsən.
Kükrəyib daşaraq selə dönmüsən,
Ağlar ürəyimin göz yaşı sənsən.

Sıfıra enibdir yeriş sürətin,
Qarşıma çıxmağa varmı cürətin?
Billəm, yandırmağa yoxdur qüdrətin,
Sönən ocağımın köz daşı sənsən.

Ətrafımda bütün dünya fırlanar,
Damcılar damarsa yeri qırlanar.
Oxuya bilənin gözü nurlanar,
Ömür kitabımın söz qaşı sənsən.