Günortanxeyir Şiiri - Sevinc Arzulu

Günəş artıq çıxıbdır,
Əllərimi sıxıbdır.
Qaranlığı yıxıbdır,
Daş kimi yatan, xeyir.
Günün-günortan xeyir.

Bəzənər xülyasında,
İşıqlı dünyasında.
Masmavi röyasında,
Süd gölə batan, xeyir.
Günün-günortan xeyir.

Güllərin çoxusunda,
Şirinlik qoxusunda.
Yatıb da yuxusunda,
Arzuya çatan, xeyir.
Günün-günortan xeyir.

Yarı tənha qoymayıb,
Söhbətindən doymayıb.
Şənliklərdə oynayıb,
Dərd-qəmi atan, xeyir.
Günün-günortan xeyir.

Tapıb mən tək incini,
Sakitini, dincini.
Sevib də Sevincini,
Fərəhə qatan xeyir.
Günün-günortan xeyir.