Deyirler Şiiri - Sevinc Arzulu

Bu yol gedir görən hara,
Çəkməyin siz məni dara.
Dünyanın bir üzü qara,
Biri ağdır, deyirlər.

Övlada şərbət içirmək,
Toy edib gəlin köçürmək,
Hər vaxt gözəl gün keçirmək,
Xoşbəxt çağdır, deyirlər.

Nə var burda alçalmalı,
Yaxşı işə əl çalmalı.
Gördüyün o ağ çalmalı,
Uca dağdır, deyirlər.

Ərgənlik yaşına dolan,
Həyat gülü tezcə solan.
Vətən üçün şəhid olan,
Daim sağdır, deyirlər.

Qəbri üstdə güllər əkin,
Su tökün, qayğısın çəkin.
Onun yeri cənnətdəki,
Yaşıl bağdır, deyirlər.