Derdindeyem Şiiri - Sevinc Arzulu

Uymadım insafə, yox,
Hər kiçik məsamə ox.
Arada məsafə çox,
Bilirəm, fərqindəyəm.

Başı qeylü-qaldasan,
Bəyazdasan, aldasan.
Ən uzaq Şimaldasan,
Ən yaxın Şərqindəyəm.

Duyğuların yox sayı,
Çox azdır fərəh payı.
Daşıb ayrılıq çayı,
Sulara qərqindəyəm.

Mizrabsız sazmışam mən,
Çiçəksiz yazmışam mən.
Yolumu azmışam mən,
Həsrətə təlqindəyəm.

Sürüşür eynəyim də,
Böyükdür köynəyim də.
Sən mənim göynəyimdə,
Mən sənin dərdindəyəm.