Batan adamam Şiiri - Sevinc Arzulu

Sayrışan ulduzu gözünüz bilin,
Sərin əsən mehi sözünüz bilin.
Mənə nə deyirsiz özünüz bilin.
Məhəbbət köşkündə yatan adamam.

Günəşin nuruna boyanıb qalxım.
Səhər yuxusundan oyanıb qalxım.
Şirin ləhcəsinə dayanıb qalxım
Xatirə nuruna batan adamam.

Yolumu ən uzaq səhraya sallam,
Gələnə yox deyib gedənlə qallam.
Kədəri dollarla versələr,allam
Fərəhi havayı satan adamam.

Ayrılıq önümdə alaçıq qurub,
Vüsala şilləni apaçıq vurub.
Gündüzlər röyadan yarımçıq durub,
Gecələr xəyala batan adamam.

Zamanı eşikdə qorxulu görüb,
Dumanı keşikdə qoxulu görüb,
Hicranı beşikdə yuxulu görüb,
Addımın astaca atan adamam.