Barışma, dünya Şiiri - Sevinc Arzulu

Yoxlayıb əzmini iradəsini,
Geydirib libasın ən sadəsini.
Içirib həyatın qəm badəsini,
Sən sərxoş etməyə çalışma, dünya.

Həsrəti sən necə qandıracaqsan,
Ağlatmaq peşəsin dandıracaqsan.
Od tutsan, bizi də yandıracaqsan,
Nə olar, qəfildən alışma dünya.

Tanrı buyruğuna dünya, əməl et,
Əzəli nöqtənə sən salamat yet.
Sağ-sola boylanma, öz yolunla get,
Allahın işinə qarışma, dünya.

O da kainatın bir övladıdır
Gah acı tamıdır, şirin dadıdır.
Istinin, işığın gözəl adıdır,
Günəşlə öc düşüb yarışma, dünya.

Kədərdən, qüssədən sıyrılıb getsəm
İlahi əmrlə buyrulub getsəm.,
Səndən əbədilik ayrılıb getsəm,
Heç vaxt yoxluğumla barışma, dünya.