Bağlı qapım Şiiri - Sevinc Arzulu

Xalçaya toxumaz ki,
Qırmızımı, abımı.
Kimsələr oxumaz ki,
Ayrılıq kitabımı.

Zaman yenə qan edər,
Gecəni al dan edər.
Tanrı imtahan edər,
Yoxlar dərdə tabımı.

Mən ki günahsız mələk,
Neynədin zalım fələk.
Əsdi ruzigar, külək,
Qırdı ümid sapımı.

Torpaq isidəcəkmi,
Şaxta üşüdəcəkmi.
Desəm, eşidəcəkmi
Söhbətimi, gapımı.

Yalvarıram Allaha,
Çıxaq nurlu sabaha.
Aydın gedib, bir daha
Açmaz bağlı qapımı.