Arzularım qocaldı Şiiri - Sevinc Arzulu

Pəncə, yekə Sə deyəndə,
Canavara Mə deyəndə,
Özgəsinə hə deyəndə
Zaman özü öc aldı.

Hicrin başın tumarladı,
Yollarını hamarladı.
Vüsalını qamarladı,
Həsrətini gec aldı.

Nə gözlərsən qara duldan,
Verməz sənə para- puldan.
Əsir olan xara quldan,
Qul sahibi bac aldı.

Gül önündə çökdüm ki mən,
Dibinə su tökdümki mən.
Elə nalə çəkdim ki mən,
Ay-ulduza ucaldı.

Dərdi başdan atmamışkən,
Torpaq altda yatmamışkən.
Altmış yaşa çatmamışkən,
Arzularım qocaldı.