Arpaeminizade Sami Şiirleri - Şair Arpae ...

Hazret-i hân Ahmed-i gâzî vezîr-i a’zamın
Eyleyüp serdâr taht-i mülket-i ma’mûreden

Moranun fethin murâd idüp o sultân-i gayûr
Düşmene bildürdi haddin savlet-i mevfûreden

I
Hecr-i ruhsârunla âteşler bırakdun cânuma
Dâglar yakdun gamunla sîne-i sûzânuma
Hâsılı kâr eyledi ‘aşkun dil-i nâlânuma
Vechi var yansam yakılsam ‘aşk ile sultânuma
II

Hecrün hayâl idüp dahı va’d-i visâlde
Olduk zebûn keş-me-keş-i ihtimâlde

Âgûş-zîb-i vuslat olur mı muhâl iken
Güncâyişi o mûy-miyânun hayâlde

Hengâm-i dey irişdi yine bâd-i subh-dem
Oldı çemen-tırâz-i nev-âyîn-i köhne dem

Nakkâş-i tâze-tarh-i bahâr-i kühen yine
Levh-i zemîne eyledi nakş-i siyeh kalem

Her gonçe-i nev-rüste nigâh itmege degmez
Âvîze-i destâr-i külâh itmege degmez

Çevgân-i temennâ ile hâmûn-i keremde
Gûy-i himeme kaddi dütâh itmege degmez

Hezârân müjdeler kim genc-i eltâf-i İlâhîden
Nümâyân oldı bir dürr-i cihân-pîrâye-i ta’zîm

Yine ‘âlemde bir nûr-i mücessem togdı mihrâsâ
Sipihr-i saltanatdan oldı pertev-dâd-i heft-iklîm

Hilâl-i ‘îd kim pîrâye-bahş-i çerh-i mînâdur
‘Amûd-i subh ile tâk-i binâ-yi ‘arş ber-pâdur

Zihî subh-i tarab kim gerden-i cânân gibi mergûb
Sevâd-i leyl ise mânend-i zülf-i ‘anberâsâdur

Hoy-kerde-rû iderse o gül-berg-i ter zuhûr
Gözden be-cây-i eşk ider âb-i güher zuhûr

Dil-teng-i cevre şehd-i mükâfât ider zuhûr
Tûtî kafes-nişîn iken eyler şeker zuhûr

Hudânun vahdet-i zâtın ‘ıyân eyler zuhûrâtı
Belî şâhid yeter envâr-i şemse kendü zerrâtı

Basîretle nigâh it cümle eşyâ mahv-i nûr olmış
Ki ‘aks-i vechi zâhir gördügün sanma hayâlâtı

Hudâ-yi ‘azze ve cel kudretin idüp izhâr
‘Iyâna çıkdı nukûş-i ‘acîbe-i esrâr
Be-vefk-i hükm-i şu’ûnât-i hâlik-i cebbâr
İdince levhe kalem sebt kâr-i leyl ü nehâr
Sipihr tâkına târîh-i sâl-i yümn-âsâr