Yetirdim Şiiri - Sevinc Arzulu

Bu soyuq küləklər əsir haradan,
Bəzən seçməyirəm ağı qaradan.
Sənə yalvarıram uca Yaradan,
Qorxulu etmə gəl uyğularımı.

Astaca bivəfa dostu yanladım,
Pıçıltı səs ilə onu danladım.
Mən necə qabardım, necə anladım,
İçimdə gizlənən duyğularımı.

Gözəl gələcəyi xəyal edirəm,
Ulduzu doğrayıb hilal edirəm.
Hey özüm – özümə sual edirəm,
Fələk azaldarmı qayğılarımı.

Lalənin üzündə qaralan xalam,
Ayrılıq önündə dinməzəm, lalam.
Baş əyib hamıya verərək salam,
Yetirdim dostlara sayğılarımı.