Üzü qürbete Şiiri - Sevinc Arzulu

ÜZÜ QÜRBƏTƏ

Bir qurumuş kol alıram,
Tikanları bol alıram.
Gecə-gündüz yol alıram,
Üzü qürbətə, qürbətə.

Rahat yuxu yatacaqmı,
Qızılgülə batacaqmı.
Sevdiyinin çatacaqmı,
Sözü qürbətə, qürbətə.

Fələkdən bircə gün çalsın,
Şirin xəyallara dalsın.
Yalanları burda qalsın,
Düzü qürbətə, qürbətə.

Sevdim üzü güləşimi,
Gizlətməyin günəşini.
Söndürməyin atəşini,
Közü qürbətə, qürbətə.

İldırım tək çaxacaqdır,
Yandırıban yaxacaqdır.
Öləndə də baxacaqdır,
Gözü qürbətə, qürbətə.