Soruşmuram Şiiri - Sevinc Arzulu

Soruşmuram hardasan,
Soruşmuram kimləsən.
Dərdimi kimə deyim,
Nə olar ki dinləsən.

Dinlə sən ürəyimin,
Qəlb sıxan hekayəsin.
Yanarsan sən halıma,
Kəsilər də nəfəsin.

Ümidin üzülməyi,
Allah, yaman olurmuş.
Dərdlərin düzülməyi,
Axır zaman olurmuş.

Bitib tükənib artıq,
Gəlməyir də nəfəsim.
Daşa söykənib artıq,
Yıxılacaq qəfəsim.

İçindən çıxacaqdır,
Zülməti boğan günəş.
Gecəni yıxacaqdır,
Yenidən doğan günəş.