Sevdam menim Şiiri - Sevinc Arzulu

Taleylə oynadım oyun,
Axır ona əydim boyun.
Söylə,səndən necə doyum.
Qaragözlü sevdam mənim.

Mənsizlikdən bezərdinmi,
Qəmi gözdən sezərdinmi,
Tənhalığa dözərdinmi,
Qaragözlü sevdam mənim.

Kökdən düşüb vüsal tarım,
Qalmayıb əldə tutarım.
Səni harda de,axtarım,
Qaragözlü sevdam mənim.

Dağda duman,çəni gəzdim,
Saçındakı dəni gəzdim.
Hey axtardım,səni gəzdim,
Qaragözlü sevdam mənim.

Göydən yerə endim sənçün,
Ulduz idim,söndüm sənçün.
Lal heykələ döndüm sənçün,
Qaragözlü sevdam mənim.