Şeirleşmişem Şiiri - Sevinc Arzulu

Alın yasısından qaçammaz kimsə,
Günəş tək nurunu saçammaz kimsə.
Mənim tilsimimi açammaz kimsə,
Oduna düşübən sehrləşmişəm.

Həsrətin sevinci, fərəhi udib,
Gəl mənə ümid ver yalnız bir udum.
Üzümü o uca göylərə tutub,
Gün ilə, Ay ilə xeyrləşmişəm.

Xəyallar içində azmışam, gülüm.
Simləri qırılmış sazmışam, gülüm.
O qədər şeirlər yazmışam, gülüm.
Özüm də bir azca şeirləşmişəm.