Qayıt geriye Şiiri - Sevinc Arzulu

Biz ki tanış olduq nisan içində,
Görüş məkanımız leysan içində.
Sahildə neçə min insan içində,
Tək-tənha gəzənim, qayıt geriyə.

Vüsalın qapısın döyəmmədin sən,
Sevib-seçdiyini öyəmmədin sən.
Deyəsən halımı bəyənmədin sən,
Bir azca bəzənim, qayıt geriyə.

Dağılıb dumanım, çənim-çiskinim,
Sənin gəlişinə yollar diksinib.
Sevda baxçamıza qəfildən girib,
Gülləri əzənim, qayıt geriyə.

Atımı dördnala heç çapammıram,
Dəniz sahilindən qum tapammıram.
Küt gedir, çörəyi düz yapammıram,
Pozulub düzənim, qayıt geriyə.

Həyat davam edər axışı ilə,
Xalı məşhur olar naxışı ilə.
Buz kimi somsoyuq baxışı ilə,
Könlümü üzənim, qayıt geriyə.