Nalan eşqim Şiiri - Sevinc Arzulu

Əvvəlində baxçamızda
Al qızılgül olan eşqim.
Sonra da xoş çağımızda,
Qəfilcədən solan eşqim.

Nələr oldu sənə, nələr,
Haqqında min əfsanələr.
Qalıb acı xatirələr,
Milyon yaşa dolan eşqim.

Baş tutmadı ziyafətim,
Qara gəldi məhəbbətim.
Nədən qopdu qiyamətim,
Ömrüm oldu talan, eşqim.

Əzbər dedi vidasını,
Sonda qoydu nidasını.
Vəslin sevgi adasını,
Gur dalğalar alan eşqim.

Xatirələr acı-ağır,
Dara düşsən məni çağır.
Bir gözündən qüssə yağır,
Bir gözüsə nalan eşqim.