Mavi baxış Şiiri - Sevinc Arzulu

Güzgüləndim, süsləndim,
Çiskinləndim,sisləndim.
İliyədək islandım,
Mavi yağışın altda.

Mən ki gözəl pəridim,
Müşfiqin Dilbəridim.
Şam kimicə əridim,
Mavi baxışın altda.

Həsrətdən kar aşmayır,
Vəslin səbri daşmayır.
Qara rəng yaraşmayır,
Mavi naxışın altda.

Külək məni saymayır,
Dalğalarla oynayır.
Yosunlarmı qaynayır,
Mavi axışın altda.

Çətin ki qocalaram,
Gənclikdən bac alaram.
Göylərə ucalaram,
Mavi alqışın altda.