Könlümün günü Şiiri - Sevinc Arzulu

Məhəbbət həmişə yarımcan olur,
Şərab tək qanı da bir fincan olur.
Dostum, iki qəlbdə bircə can olur,
Sevdalım deyərsən sadiq həmdəmə.

Neynəyim müştəbeh, lovğalarımla,
Mən ki tanınmıram qovğalarımla.
Çoxunu batırdım dalğalarımla,
Qıymaram dönəsən taleyi kəmə.

Qoyma ki əsən yel yolsun, a dostum,
Qıyma ki çiçəyin solsun, a dostum.
Şor-çörək halalın olsun, a dostum,
Özgənin haram bal-çörəyin yemə.

Gül açsın dağ-dərən, çəmənin, düzün
Gün doğsun,əritsin vüsalın buzun.
Həmişə gülüşə bürünsün üzün,
Alaca gözlərin batmasın nəmə.

Sürdüyüm həyatla daim öyünüm,
Heç əskik olmasın toyum-düyünüm.
Həmişə ağ olsun könlümün günü.
Batmasın kədərə, nə də ki qəmə.