İnce çekilib Şiiri - Sevinc Arzulu

Torpağın altını qazırlar nədən.
Yeraltı yollarda azırlar nədən.
Intihar rəsmini cızırlar nədən,
Taranlıq bayqular lincə çəkilib.

Yamanlar yadlara pisləyir bizi,
Yaxşılar qoynunda bəsləyir bizi.
Işıqlı arzular səsləyir bizi,
Toranlıq qayğılar dincə çəkilib.

Yolumuz üstündən alağı biçək,
Bulağın gözündən sərin su içək.
Anladı bitirməz nə gül, nə çiçək,
Şoranlıq sayğılar öncə çəkilib.

Gəl mənə çox görmə,əzizim, bir zəng,
Səsimiz yaratsın çox gözəl ahəng.
Mənim yuxularım indi rəngarəng,
Qaranlıq uyğular küncə çəkilib.

Eşidib ayırd et doğma kəsləri,
Həmişə ucadan gəlsin səsləri.
Bir qədər kobuddur dağın hissləri,
Aranlıq duyğular incə çəkilib.