Hardasa Şiiri - Sevinc Arzulu

Hardasa könlümün dərinliyində,
Hardasa köyümün sərinliyində
Xəzinə gizlənir, dostum, xəzinə.
Qoymam ki pis ruhlar orda gəzinə.

O yerdə nənəmin ayaq izi var,
O yerdə babamın dəmir mizi var.
O yerdə gizlənib lal xatirələr,
Bəyaz xatirələr,al xatirələr.

Orada atamın şüası vardır,
Orada anamın duası vardır.
Ordadır hələ də közərən közüm,
Orda əbədilik qalacam özüm.