Gedim ayılığın evini yıxım

Taleyi yazmağa qüdrətim çatmır,
Zaman çox tez uçur, sürətim çatmır.
Sözümü deməyə cürətim çatmır,
Gedim gözlərimin qorasın sıxım.

Oduna yandığım oduma yanmır,
Vicdanı yatıbdır, daha oyanmır.
Yamanca kövrəlib bulud, dayanmır,
Gedim Qaf dağının başına çıxım.

Ayağım altında qaynayır qumsal,
Dediyim hər dua bir zərbi-misal.
Məndən üz çevirib alagöz vüsal,
Gedim ayrılığın evini yıxım.