Eça Me3'omila Mut'i Varğirur

Ar omuri govovuçvar deyite
Zade mayoropu çona gurite
Mego3’eda cegişk’vare şurite
Eça me3’omila mut’i varğirur!

İrindğa goynturer tekvimi st’eri
Ndğaleri var mvat’en net’k’vare seri
Meleği vatort’a mondo or peri
Eça me3’omila mut’i varğirur!

Ho dot’k’vi deyite komeft’i t’ora
Yuzuği cidvart’u mektebi ora
Berepe codvart’u Çona do Mcora
Eça me3’omila mut’i varğirur!

Ham oraşa ham nosi muç’o şinaxi
O k’ada t’k’vare çi axi do vaxi
Si xolo dip’lanar ma vor cunaxi
Eça me3’omila mut’i var ğirur!

Avit’a murun3xon sufet’i sk’ani
Arat’a cinst’işon çuflet’i sk’ani
Msk’anoba var bgorum giğurt’ay, sk’ani
Eça me3’omila Muti var ğirur!

O k’ada t’k’varçi a domgoruko
Ort’ay do m3udişi a domğoruk’o
Guri mvalasi a igoruk’o
Eça me3’omila muti var ğirur!

Sk’ani-şeni kodolovoli bela
Ar fara var t’kvi çi şk’imdaşa ela
Soğuni p’i bğuri komemçi sela
Eça me3’omila mut’i var ğirur!

Nanask’ani dixeni avuk’at’i
Zitamuşite memeşkvi p’at’i
Huy oxori xvala mu are yat’i
Eça me3’omila mut’i var ğirur!

Oçi hişo Aravişa moy mextti ğoma
Momazirt’ay deyi dimpuli toma
Guri var giğun do moberçam homa
Eça me3’omila mut’i var ğirur!

Sum bere pat’ert’u ar muşi Mcora
Gza cogutinart’u mektebi ora
Hik’o msk’va t’k’vi çi majeru t’ora
Eça me3’omila mut’i var ğirur!

Ata navar arttu soğuni doyi
Huy pişmani vore mi3’omer hoyi?
Dudi cemibi momç’ari çoyi
Eça me3’omila muti var ğirur!

Nana zit’a şeni mitaxu guri
Oncğore vargayen mendiğu uri
Si xolo vorsore mogazden şuri
Eça me3’omila mut’i var ğirur!

Gzas memagisi komemosk’udi
Himdoti cemoturt’u namomçi kudi
Siti gak’omadu moit’ur m3udi
Eça me3’omila mut’i varğurur!

ham dest’enepe giğurt’ay sk’ani
Ham si monç’arapi muperon msk’vani?
Ma si p’ot’ti vamegamsk’vani
Eça me3’omila mut’i varğirurt!