Bir tablo Şiiri - Sevinc Arzulu

Dünyanın milyon rəngi,
Bir tabloda canlanıb.
Könlümdə eşq ahəngi,
Gözümdə şer anları...

O duyğusal günlərin,
Xatirəsi bəsimdir.
O mehriban ünlərin,
Çoxu mənim səsimdir.

Gülmüşəm, danışmışam
Sevdiklərimlə birgə.
Həsrətlə tanışmışam,
Salıb hüsnümə kölgə...

Bu kölgəni siləməz
Ən mahir rəssam belə.
Ayrılıq əfv diləməz,
Yansa sanki şam belə.

Gərək özüm acımı,
Sığallayıb yatırım.
Qoruyub qəlb tacımı,
Gələcəyə ötürüm...