Bamsı Beyrek Şiiri - Sevinc Arzulu

Göyün qatında çırpınan,
Bəyaz atında çırpınan.
Köksün altında çırpınan,
Bir ovucluq ürəkmidir.

Hərdən məni unudursan,
Xatirəmi ovudursan
Ayrılığı bərk tutursan
Hicran sənə gərəkmidir.

Gedənlərə qarışırsan,
Ayrılıqla yarışırsan.
Hicran ilə barışırsan,
Süfrəndə duz-çörəkmidir.

Həsrət çəkmək sanma asan.
Daş-dəmirdən deyil insan.
Buralarda sanki leysan,
Orda yağış seyrəkmidir.

Yaşıllaşıb dağım-daşım,
Gül-çiçəkdir addımbaşı.
Ovcundadır gözün yaşı,
Könlün yenə köyrəkmidir.

Dar günlərdə bizi ovut,
Gözümüzün yaşın qurut.
Hardasan ay Dədə Qorqud.
Nağıl dili yüyrəkmidir.

Bulaq üstdə səhəng görün,
Ətraf bəyaz əhəng, görün.
İstəyirəm nəhəng görün,
Adın Bamsı Beyrəkdmidir.