Ayrldq Şiiri - Sevinc Arzulu

AYRILDIQ

Zəhər olar bal düşmənin əlində,
Olma heç vaxt xal düşmənin əlində.
Qaldım yenə lal düşmənin əlində,
Nə vuruşduq, nə dalaşdıq, ayrıldıq.

Mən kəşf etdim deyən səntək dühanı,
Ucuz satıb nədən aldın bahanı.
Birgə gəzdik,dostum, bütün cahanı,
Bu dünyanı cüt dolaşdıq, ayrıldıq.

Axır vaxtlar calanmayır söz-sözə,
Alışmaqçun dayaq olmur köz-közə.
Son saatda gəlmədik ki göz-gözə,
Uzaqdanca vidalaşdıq, ayrıldıq.

Kədərimi sezər oldu ölüm də,
Ol həsrətdən bezar oldu ömrüm də.
Dağlar belə düzən oldu önümdə,
Keçilməyən min yol aşdıq, ayrıldıq.

Geridə qalıbdır nur sabahımız,
Zirvəyə yüksəlibaman- ahımız.
Bax, necə də pərvaz edir ruhumuz,
Göy səmaya çox yaraşdıq, ayrıldıq.