Zâ’il olmaz devlet-i fakr âfet-i eflâkdan
Câme-i ‘uryân teni dâ’im emindür çâkdan
Her has ü hâr ile olma hem-nişîn ey gonçe-fem
Kadr-i hüsni bil gül-i ruhsâr bitmez hâkdan
Herkesün bâg-ı cihân içinde bir dil-hˇ âhı var
Gülden efzûn hazz ider mahmûr-ı berg-i tâkdan
Ey dil harâb-ı gamze-i hûbân degül misin
Seng-i cefâ vü cevr ile vîrân degül misin
Ben tîre kevkeb olduguma kâni‘ olmışam
Ey mâh sende fitne-i devrân degül misin
Hep va‘de-i dürug ile geçdi zamân-ı hüsn
Bir kerre togrı söyle müselmân degül misin
Kimse bilmez ben kadar zevk u temâşâ kıymetin
Lâle-i dil-hûn bilür dâmân-ı sahrâ kıymetin
Ehl-i tecrîd oldugum çün i‘tibârum kalmadı
Hayf bilmezler bu kâfirler Mesîhâ kıymetin
Gark-ı bahr-ı hicrden sor lezzet-i dîdârını
Sâkin-i sâhil ne bilsün dürr-i yektâ kıymetin
Yâr yâr olsun da a‘dâ bildüginden kalmasun
İtmezüz terk-i temâşâ bildüginden kalmasun
Kayd-ı zülfünden dil-i şeydâ asılsa geçmezüz
Biz de yokdur gayr-ı sevdâ bildüginden kalmasun
Sûz ile sîb-i zenahdânında hâmın almışuz
Gamze-i nâ-puhte cânâ bildüginden kalmasun
Gönül bilmem ne şem‘ün pertev-efzûn oldı nûrından
Ki fânûs-ı hayâl-i sîneye sıgmaz huzûrından
Müyesser olmadı hergîz safâ-yı neşve-i zâtı
Cihânun ‘âciz oldum sâhte zevk ü sürûrından
Nümâyân âsmândur sanma ‘ömrün reh-güzârında
Bülend olmuş turur bir girddür dehrün mürûrından
Marîz-i ‘aşk-ı hûbânam ki sıhhat dûr olur benden
Mesîhâ gelse ger bâlînüme rencûr olur benden
Libâs-ı ‘âfiyet sad-çâk o rind-i mey-perestem kim
Salâh âzürde hâtır-ma‘siyet mesrûr olur benden
Olur erbâb-ı ‘aşka bâ‘is-i hâtır-perîşânî
Rumûz-ı ‘aşkdan her satr kim mestûr olur benden
Şem‘a pervâne ile güft ü şinîd olmaz hîç
Sûz-ı dil kâsıd olan yerde berîd olmaz hîç
Subh u şâm şeb ü rûz gam u şâdî birdür
Biz karâr itdigümüz şehrde ‘îd olmaz hîç
Tıfl-ı eşküm gibi çeşmüm yeridür yârânun
Hâne-i âyîneye kufl u kilîd olmaz hîç
Cânâ dil-i erbâb-ı vefâdan mı gelürsin
Ey ka‘be-i maksûd safâdan mı gelürsin
Şebnem gibi gökde aranur yerde bulındun
Ey mihr-i cihân-tâb semâdan mı gelürsin
Ey murg-ı dil ol zülf-i siyehden nice geçdün
Yâ baht-ı sa‘âdetle hümâdan mı gelürsin
Sordı o perî lutf iderek derd-i dilümden
Kimden ideyüm şekve didüm didi elümden
Mi‘mâr-ı kederhâne-i agyâr iken ol şûh
Dest-i sitem ü cevr ile yakdı temelümden
Bilse kime vâ-bestedür ümmîdümi zâhid
Seccâde ider rişte-i tûl-ı emelümden
Zamâne hasret-i bezm-i tarab-fezâmuz iken
O vahşi olmada bîgâne âşinâmuz iken
Müdâm sâye-nişîn-i nihâl-i âhum idi
Bahâr-ı ‘ârızı gülzâr-ı dil-güşâmuz iken
Kemend-i zülfüne ta‘lîm-i tâb iden biz idük
Zamân ile o sitem-pîşe dilrübâmuz iken
Bu şaire henüz hiç kimse yorum yapmadı. İlk yorum yapan sen ol!