A qızlar Şiiri - Sevinc Arzulu

Arzusuna yetdimi
Görən o dilbər gəlin.
Xına rəngdə etdimi
Həm ayağın, həm əlin.

Qovuşdu özgəsinə,
Sevdiyinə qıymadı.
Məskəni özgə sinə,
Sevdalını duymadı.

Qızıl-ziynət verəsən,
Var görüb yolun çaşdı.
Xoşbəxtdimi görəsən,
Bəs niyə gözü yaşdı.

Bilmədi oyuncaqdır,
O, varlının əlində.
Çətin ovunacaqdır,
Varlının əməlindən.

Salıb qızıl qəfəsə ,
Tənha quşlar sayağı.
Qısqanıb hər nəfəsə.
Bağlayıb əl-ayağın.

Həqiqəti sezərək,
Min bir fikrə gedəcək.
Tənhalıqdan bezərək,
Özünə qəsd edəcək.

Bu çıxış yolu deyil,
Ayıq olun a qızlar.
Salmayın vara meyl,
Sonda qəlbiniz sızlar...